Ration card : ఏపీ రేషన్ కార్డు దారులకు శుభవార్త.. ఈ పత్రం చూపిస్తే కొత్త రేషన్ కార్డు

Ration card : ఏపీ రేషన్ కార్డు దారులకు శుభవార్త.. ఈ పత్రం చూపిస్తే కొత్త రేషన్ కార్డు

Ration card : ఆంధ్రప్రదేశ్ రేషన్ కార్డు కోసం దరఖాస్తు చేసుకున్న వారికి ప్రభుత్వం శుభవార్త అందించింది. రాష్ట్రంలో కొత్త ప్రభుత్వం ఏర్పాటవుతున్న నేపథ్యంలో రేషన్‌కార్డుల పంపిణీ ప్రక్రియను ప్రభుత్వం త్వరలో ప్రారంభించనుంది. ఈ క్రమంలో కొత్తగా పెళ్లయిన వారు రేషన్‌కార్డు కోసం దరఖాస్తు చేసుకునేందుకు ప్రభుత్వం అనుమతించనుంది. అయితే వివాహ ధృవీకరణ పత్రం చూపిస్తే రేషన్ కార్డు కోసం దరఖాస్తు చేసుకోవచ్చని తాజాగా ప్రభుత్వ వర్గాలు తెలిపాయి. ఆంధ్రప్రదేశ్‌లో త్వరలో రేషన్ కార్డుల ( Ration card ) పంపిణీ ప్రారంభం కానుంది.

రేషన్‌కార్డు

త్వరలో కొత్త రేషన్‌కార్డుల జారీ ప్రక్రియ ప్రారంభిస్తామని state food civil department  మంత్రి నాదెండ్ల మనోహర్‌ ( Nadendla Manohar ) ఇప్పటికే తెలిపారు. వివాహ ధృవీకరణ పత్రం ఆధారంగా కొత్తగా పెళ్లయిన జంటలకు రేషన్‌కార్డు ఇస్తామని తెలిపారు. గతంలో వైఎస్ జగన్ మోహన్ రెడ్డి నేతృత్వంలోని వైసీపీ ప్రభుత్వం 2019 నుంచి 2024 వరకు జారీ చేసిన రేషన్ కార్డులపై జగన్ చిత్రపటాన్ని, వైసీపీ రంగులను ముద్రించింది. అయితే జగన్ బొమ్మ, వైసీపీ రంగులు తొలగించి రాష్ట్రవ్యాప్తంగా కొత్త రేషన్ కార్డులు జారీ చేయాలని ప్రభుత్వం ఇప్పటికే నిర్ణయించింది. ఈ క్రమంలో కొత్త రేషన్ కార్డుకు సంబంధించిన డిజైన్‌ను అధికారులు పరిశీలిస్తున్నారు. ప్రస్తుతం ఆంధ్రప్రదేశ్‌లో 1.48 కోట్ల రేషన్‌కార్డులున్నాయి. ఇందులో ఆహార భద్రత చట్టం కింద కేంద్ర ప్రభుత్వం 89 లక్షల రేషన్ కార్డులకు నిత్యావసర వస్తువులను అందజేస్తోంది.

మిగిలిన కార్డుల కేటాయింపు ఖర్చు రాష్ట్ర ప్రభుత్వమే భరిస్తుంది. అయితే వీటన్నింటినీ కేంద్ర ఆహార భద్రతా చట్టం పరిధిలోకి తేవాలని రాష్ట్రం కేంద్ర ప్రభుత్వాన్ని డిమాండ్ చేస్తుండగా.. కేంద్ర ప్రభుత్వం మాత్రం నిబంధనలను పాటించడం లేదని చెబుతోంది. కేంద్ర మంత్రిని కలిసేందుకు ఇటీవల ఢిల్లీ వెళ్లిన పౌరసరఫరాల శాఖ మంత్రి నాదెండ్ల మనోహర్( Nadendla Manohar ) రేషన్ కార్డుకు ( Ration card ) సంబంధించి కీలక ప్రకటన చేశారు. నూతన వధూవరులు కొత్త రేషన్ కార్డు కోసం దరఖాస్తు చేసుకుంటే వారికి ప్రాధాన్యత కల్పిస్తామని తెలిపారు. అర్హులైన వారికి త్వరలో కొత్త రేషన్‌కార్డు అందజేస్తామని తెలిపారు. ఈ క్రమంలో మంత్రి మనోహర్ మాట్లాడుతూ.. రేషన్ డోర్ డెలివరీలో గత ప్రభుత్వం 1800 కోట్ల రూపాయలను వృధా చేసిందన్నారు. ఇంటింటికీ రేషన్‌ పంపిణీపై కేబినెట్‌ సమావేశంలో నిర్ణయం తీసుకుంటామన్నారు.

అయితే గతంలో అధికారంలో ఉన్న జగన్ ప్రభుత్వం 2020లో అర్హులైన వారందరికీ రేషన్ కార్డుల కోసం దరఖాస్తు చేసుకుంటే 5 రోజుల్లో అందజేస్తామని ప్రకటించింది. అయితే ఆ తర్వాత కొన్ని రోజులకు కేవలం రెండున్నర గంటల్లోనే సచివాలయం ద్వారా రేషన్ కార్డు ( Ration card ) ఇస్తామని చెప్పారు. ఐదేళ్ల వైసీపీ పాలనలో కేవలం 1.10 లక్షల కొత్త రేషన్‌కార్డులు మాత్రమే పంపిణీ అయ్యాయి. 2019 జూన్‌లో వైసీపీ అధికారంలోకి వచ్చే నాటికి రాష్ట్రంలో 1,47,33,044 రేషన్ కార్డులు ఉన్నాయి. ఆగస్టు 2024 నాటికి వారి సంఖ్య 1,48,43,671కి పెరిగింది.

మరోవైపు పెళ్లయిన వ్యక్తికి కొత్త కార్డు ఇవ్వాలంటే వారి కుటుంబంలోని ప్రస్తుత రేషన్ కార్డు నుంచి పేరు తొలగించాల్సి ఉంటుంది. కానీ ప్రభుత్వం అనుమతించలేదు. దీంతో కొత్త దంపతులకు కొత్త రేషన్ కార్డు రాలేదు. అయితే ఈ సమస్యను పరిష్కరించేందుకు చంద్రబాబు ప్రభుత్వం వివాహ ధృవీకరణ పత్రం ఆధారంగా రేషన్ కార్డులు ఇవ్వాలని నిర్ణయించింది.